Dimma

Dauði og djöfull er titill nýrrar plötu Sálgæslunnar, hljómsveitar sem skartar óvæntri samsetningu topp listamanna úr ólíkum geirum.  Andrea Gylfadóttir og Stefán Hilmarsson syngja, Sigurður Flosason leikur á saxófóna, Þórir Baldursson á Hammond orgel og Einar Scheving á trommur.  Soul, blús og jazz renna saman í ólíkum hlutföllum undir  taktföstum hljóðfæraslætti og húmorinn er aldrei langt undan.  Sjö aðrir hljóðfæaleikarar koma við sögu á disknum, en Þórir Úlfarsson gerði strengjaúsetningar og Sigurður Flosason blástursútsetningar. Tónlistin er öll eftir Sigurð Flosason, en textar ýmist eftir hann eða Aðalstein Ásberg Sigurðsson.   

Skáldsagan Ljósa eftir Kristínu Steinsdóttur er komin út á hljóðbók í lestri höfundar. Sagan hefur hlotið einróma lof og fyrir hana hlaut höfundurinn Menningarverðlaun DV 2010 og Fjöruverðlaunin, bókmenntaverðlaun kvenna 2011.

Ljósa elst upp í afskekktri sveit seint á 19. öld. Hana dreymir um framtíð þar sem hamingjan ríkir og sólin skín. En veruleikinn ætlar henni annað; þrátt fyrir góð efni og ástríka fjölskyldu vofir yfir henni ógn sem gefur engin grið.

Ljósa er hrífandi frásögn um gleði og sorgir einstakrar konu sem glímir við óvanalegar aðstæður..

Kristín Steinsdóttir hefur skrifað fjölda bóka og hlotið margvíslegar viðurkenningar fyrir verk sín. Margar af bókum hennar hafa komið út á hljóðbók.

Ljósa er  5:20  klst. Að lengd á einum mp3 diski, sem hægt er að spila í öllum dvd spilurum, tövlum og mp3 spilurum. Hljóðvinnslan sá um hljóðritun.

Út er komið á hljóðbók smásagnasafnið Milli trjánna eftir Gyrði Elíasson, bókin sem hlýtur Bókmenntaverðlaun Norðurlandaráðs 2011. Sigurður Skúlason leikari les sögurnar 47, sem einkennast af þeim áreynslulausa og myndríka stíl sem prýðir verk höfundarins. Í sögunum kallast umfjöllunarefnin ennfremur á við fyrrri sögur Gyrðis og bregður fyrir ýmisskonar óhugnaði og furðum, einsemd, draumum, ferðalögum, bernskuminningum og framtíðarsýnum.

Milli trjánna undirstrikar þá markvissu þróun sem orðið hefur í sagnaveröld Gyrðis í átt til eindregnari efnistaka, um leið og við erum minnt á grunngildi tilvoru okkar í þessum fjölbreytti en þó heildstæðu smásögum.

Hljóðbókin er  5:40  klst. að lengd á einum mp3 diski, sem hægt er að spila í öllum dvd spilurum, tövlum og mp3 spilurum. Georg Magnússon sá um hljóðritun. Kápuhönnun var í höndum Aðalsteins S. Sigfússonar.

Fjórðu minningartónleikarnir um söngvaskáldið Bergþóru Árnadóttur verða haldnir í Salnum í Kópavogi þriðjudginn 15. febrúar kl. 20. Það er Minningarsjóður Bergþóru sem efnir til tónleikanna en þeir eru að vanda haldnir á afmælisdegi hennar. 

Að þessu sinni verða mörg af þekktari lögum Bergþóru flutt í fyrsta sinn í kórútsetning-um og koma þrír kórar við sögu, en stjórnandi þeirra er Guðlaugur Viktorsson. Um er ræða hinn landsþekkta Lögreglukór Reykjavíkur, Kór Menntaskólans í Reykjavík og Vox Populi. Einnig kemur söngvarinn Jónas Sigurðsson fram með Lögreglukórnum.  Undirleik annast Gunnar Gunnarsson á píanó, Vilhjálmur Guðjónsson á gítar,  Tómas R. Einarsson á kontrabassa og Hjörleifur Valsson á fiðlu. Þau Aðalheiður Þorsteinsdóttir, Bára Grímsdóttir,  Skarphéðinn Hjartarson og Tryggvi M. Baldvinsson hafa útsett söng-lög Bergþóru fyrir karlakór og blandaða kóra.  Kynnir á tónleikunum verður Aðalsteinn Ásberg Sigurðsson. Þess er að vænta að tónleikarnir verði einkar veglegir og því ætti enginn aðdáandi söngvaskáldsins góða að láta þá framhjá sér fara.

Nýr geisladiskur með með bestu lögum Bergþóru Árnadóttur er kominn út. Þessi útgáfa hefur að geyma 22 lög sem gefa góða mynd af Berþóru sem höfundi og flytjanda. Fyrir þremur árum kom út 5 diska heildaútgáfa með verkum hennar, en sú útgáfa er uppseld. Meðal vinsælla laga á nýja diskinum má nefna Verkamann, Lífsbókina, Borgarljós, Móðursorg og Sýnir.

Diskurinn er sá fyrsti í nýrri útgáfuröð frá Dimmu. Útlitshönnun var í höndum Vilborgar Önnu Björnsdóttur.

Hinn landskunni píanóleikari og organisti Gunnar Gunnarsson heldur útgáfutónleika í Þjóðmenningarhúsinu fimmtudaginn 2. desember kl. 21:00 Gunnar hefur sent frá sér fjölda geisladiska sem hlotið hafa einróma lof. Í tilefni af útkomu nýjustu afurðar sinnar, sem nefnist Gnótt, efnir hann til tónleika og leikur ásamt valinkunnum meðspilurum bæði nýtt og eldra efni. Með Gunnari koma fram þeir Tómas R. Einarsson bassaleikari og Ómar Guðjónsson gítarleikari. Hér er um einstakt tækifæri að ræða til að heyra eðalfínar útsetningar Gunnars á lögum sem hitt hafa margan manninn í hjartastað. Hljóðritanir Gunnars er m.a. að finna á geisladiskunum Skálm, Stef, Des, Húm og Hrím, en nú bætist Gnótt í þann fríða flokk. Forsala aðgöngumiða á midi.is