Dimma

Agnar Már bæjarlistamaður Garðabæjar 2010

2010-06-19T18:28:22Z

Agnar Már Magnússon píanóleikari hefur verið útnefndur bæjarlistamaður Garðabæjar árið 2010. Nýjasti geisladiskur hans Kvika kom út hjá Dimmu sl. haust, en áður hefur hann sent frá sér m.a. Láð (Dimma 2007) og Ég um þig (ásamt Kristjönu Stefáns, Dimma 2005). Agnar Már tónskreytti ennfremur hljóðútgáfuna Ljóð eftir Sjón sem kom út hjá Dimmu 2008. Ekki alls fyrir löngu frumflutti Stórsveit Reykjavíkur ennfremur ný verk eftir Agnar Má við góðan orðstír.

Svavar Knútur í Kanada

2010-06-19T18:13:37Z

Svavar Knútur tekur þátt í alþjóðlegu tónlistar- og kvikmyndahátíðinni North by North East í Toronto. Svavari var boðið að halda tvenna tónleika á hátíðinni, annars vegar í Cameron House og hins vegar í Rancho Relaxo. Svavar mun nýta ferðina til Kanada og flytja tónlist sína á 17. júní hátíð Íslendingafélagsins íToronto og ennfremur koma fram á einum tónleikum utan NXNE hátíðarinnar.

Svavar Knútur hefur gert víðreist það sem af er ári til að fylgja eftir geisladisknum Kvöldvöku og var m.a. á tónleikaferðalagi um Ástralíu frá byrjun janúar og fram á vor. Þá fór hann í stutta tónleikaferð til Parísar, þar sem honum var mjög vel tekið á þrennum tónleikum. Auk þess var hann fyrir skemmstu í Svíþjóð og Bretlandi, en framundan er íslenskt tónlistarsumar þar
sem hann kemur víða við.

Dvergasteinn kominn út á finnsku

2010-04-29T12:08:24Z

Barnabókin Dvergasteinn eftir Aðalstein Ásberg Sigurðsson kom út á finnsku fyrr í mánuðinum hjá Bokförlaget Idun í þýðingu Päivi Kumpulainen með nýjum myndskreytingum eftir finnska teiknarann Timo Koljonen. Dvergasteinn er þriðja bók Aðalsteins sem kemur út í Finnlandi, en áður hefur forlagið Idun gefið út bækur hans Brúin yfir Dimmu og Ljósin í Dimmuborg.

Aðalsteinn Ásberg kom fram á norrænum dögum í bænum Kuopio í síðustu viku og kynnti þá meðal annars Dvergastein, auk þess að heimsækja skóla og leikskóla þar sem hann flutti ljóð og söngva, en þar var þýðandinn Marjakaisa Matthíasson honum til fulltingis, en hún hefur auk Dimmu-bókanna þýtt bæði ljóð og söngtexta eftir hann.

Á finnsku hefur Dvergasteinn hlotið aðeins lengra nafn en á íslensku eða Haltia joka kadotti hohtokivensä sem þýðir Dvergurinn sem glataði gljásteini. Bókaforlagið Idun gefur út þýddar barnabækur á finnsku og sænsku. Sjá nánar á www.idun.fi

Cornelis Vreeswijk í Norræna húsinu

2010-02-19T00:23:07Z

Guðrún Gunnars og Aðalsteinn Ásberg flytja

úrval úr verkum söngvaskáldsins vinsæla í tali og tónum

Gunnar Gunnarsson, píanó - Jón Rafnsson, kontrabassi

Takmarkaður sætafjöldi. Forsala á midi.is Miðvikudag 24. febrúar kl. 21 - föstud. 26. febrúar kl. 21 lau. 27/2 kl. 21

lau. 6/3 kl. 21
fös.12/3 kl. 21

Í kjölfar afar vel heppnaðrar útgáfu og tónleika um land allt á síðasta ári er nú efnt til nýstárlegrar tónleikaraðar í Norræna húsinu þar sem fléttað er saman tónlist og frásögn af lífi þessa einstaka trúbadúrs. Guðrún og Aðalsteinn gera Vreeswijk verðug skil og eðalfínir textar og lög njóta sín til fulls.

Dagskráin verður flutt í örfá skipti og sætafjöldi er takmarkaður. Veitingastaðurinn Dill býður upp á tvíréttaðan matseðil á tilboðsverði sýningardagana. Kvöldskemmtun í sérflokki fyrir unnendur góðrar tónlistar!

Það sem hverfur í Þjóðmenningarhúsinu

2010-02-04T17:53:07Z

Ragnheiður Gröndal - Sigurður Flosason - Egill Ólafsson

ásamt Kjartani Valdemarssyni og Matthíasi Hemstock

á tónleikum sunnudaginn 14. febrúar kl. 20

Í tilefni af útkomu geisladisksins Það sem hverfur og vetrarjazzi í Reykjavík er efnt til tónleika í Þjóðmenningarhúsinu þar sem flutt verður ný tónlist Sigurðar Flosasonar við eyðibýlaljóð Aðalsteins Ásbergs Sigurðssonar. Tónlistin kom út á samnefndum geisladiski í nóvember sl og hlaut mjög góða dóma. Þetta er dramatísk tónlist þar sem jazz, popp, sígild tónlist og þjóðleg stef renna saman og skapa bræðing sem hæfir efninu vel. Flytjendur eru söngvararnir Ragnheiður Gröndal og Egill Ólafsson, Sigurður Flosason á ýmis blásturshljóðfæri, Kjartan Valdemarsson á píanó og hljómborð og Matthías Hemstock á trommur, trommuheila og náttúruhljóð.

Aðeins þetta eina sinn. Takmarkaður sætafjöldi!

Miðaverð: 2.500,- Miðasala á midi.is

Segðu mér og segðu ... - ný ljóð fyrir börn á öllum aldri

2009-11-04T23:28:39Z

Út er komin ljóðabókin Segðu mér og segðu ... eftir Aðalstein Ásberg Sigurðsson. Í bókinni eru yrkisefnin af ýmsum toga og fortíð og nútíð fléttast saman. Þjóðleg stef, romsur og óhefðbundin kvæði kallast á. Áður hefur Aðalsteinn Ásberg sent frá sér á annan tug frumsaminna og þýddra ljóðabóka, þar á meðal kveðskap fyrir börn í Romsubókinni sem kom út fyrir fáeinum árum. Ennfremur hefur hann skrifað skáldsögur og smásögur fyrir unga lesendur, auk þess að semja tónlist og fjölda söngljóða sem notið hafa vinsælda.

Segðu mér og segðu ... er prýdd veglegum litmyndum eftir Lindu Ólafsdóttur, sem nýlega lauk mastersnámi myndskreytingum frá Academy of Art university í San Francisco og útskrifaðist með hæstu einkunn. Áður hafði hún lokið námi úr grafíkdield Listaháskóla Íslands. Bókin er frumraun Lindu á sviði bókaskreytinga, en hún hefur tekið þátt í samsýningum listamanna í San Francisco og hlotið verðlaun fyrir verk sín.

Jafnhliða prentaðri útgáfu kemur Segðu mér og segðu ... út á hljóðbók í lestri höfundar.

Það sem hverfur - Ragnheiður Gröndal og Egill Ólafsson syngja nýja tónlist Sigurðar Flosasonar

2009-11-04T23:18:56Z

Tónskáldið og saxófónleikarinn Sigurður Flosason hefur sent frá sér nýjan disk með sönglagasyrpu við ljóð Aðalsteins Ásbergs Sigurðssonar. Á diskinum sem ber heitið Það sem hverfur er að finna 14 tónsmíðar Sigurðar við ljóð Aðalsteins úr hinni rómuðu ljóða- og ljósmyndabók Eyðibýli, sem hann og Nökkvi Elíasson gáfu út fyrir fáeinum árum, verki sem hverfist um horfinn heim sem þó stendur flestum ótrúlega nærri.

Sigurði til fulltingis á nýja diskinum eru söngvararnir Ragnheiður Gröndal og Egill Ólafsson, ásamt Kjartani Valdemarssyni, sem leikur á píanó , hljómborð, orgel, harmóníkku og hljóðgerfla, og Matthíasi Hemstock á trommur, slagverk , trommuheila og náttúruhljóð.

Tónsmíðarnar á Það sem hverfur eru af ýmsum toga og hreint ekki af ómenguðum jazzrótum heldur taka mið af sígildri tónlist, poppi og þjóðlögum, en allt rennur það á vissan hátt saman í bræðingi sem hæfir ljóðunum og skapar um leið magnaða stemmningu. ]]>

Tónlist hamingjunnar eftir Völu Þórsdóttur

2009-10-30T19:08:25Z

Dimma hefur gefið út örsagnasafnið Tónlist hamingjunnar eftir Völu Þórsdóttur og er það fyrsta bók höfundarins sem áður hefur getið sér gott orð fyrir leikrit sín bæði hérlendis og erlendis, m.a. einleikinn Háaloft og Eldhús eftir máli, sem sýnt var í Þjóðleikhúsinu. Í Tónlist hamingjunnar sýnir höfundurinn á sér nýja hlið þótt tenglsin við leikverkin séu ef til vill undirliggjandi og sumar sagnanna eigi sér rætur í þáttagerð fyrir sjónvarp.

Örsögurnar er 52 talsins og eiga það sameiginlegt að birta sérkennilega mynd af samtímanum. Persónur og atburðir koma stöðugt á óvart og fáránleikinn er sjaldnast langt undan. Geisladiskur með lestri höfundar fylgir bókinni og svo skemmtilega vill til að verkið kemur samtímis út á Íslandi og í Tyrklandi.

Geisladiskur með lestri höfundar fylgir bókinni.

Ballið á Bessastöðum komin á hljóðbók

2009-10-30T18:57:46Z

Dimma hefur gefið út á hljóðbók hina fjörugu og ærslafullu sögu Ballið á Bessastöðum eftir Gerði Kristnýju í lestri höfundar.

Sagan er um forseta, þrjá forsetaritara, gröfukarla og hjólabrettastelpu, hundrað ára gamla konu og krakkaskara sem lendir í vandræðum við Tjörnina. Kona úr Mývatnssveit, sem veit heil ósköp um ský, kemur líka við sögu. Hver getur ímyndað sér ball á Bessastöðum með öllum þessum persónum og mörgum fleiri? Saga sem gleður bæði börn og fullorðna.

Framhald sögunnar, Prinsessan á Bessastöðum, en nýkomin út í prentaðri útgáfu, en Ballið á Bessastöðum er fyrsta hljóðbók höfundarins fyrir unga lesendur.

Tónleikaupptökur Agnars Más komnar út

2009-10-30T18:52:47Z

Agnar Már Magnússon píanóleikari sendir nú frá sér nýjan geisladisk um þessar mundir með frumsaminni jazztónlist og nefnist hann Kvika. Diskurinn hefur að geyma upptökur frá tónleikum á jazzhátíð í Reykjavík 2008, þar sem fram komu ásamt Agnari Má þeir Ben Street bassaleikari og Bill Stewart trommuleikari, en báðir eru þeir vel þekktir bandarískir jazztónlistarmenn. Svo skemmtilega vill til að þeir hafa áður hljóðritað efni með Agnari þegar hann tók upp fyrsta disk sinn í New York og gaf út hjá Fresh Talent útgáfunni árið 2001. Á nýja diskinum eru 9 tónsmíðar eftir Agnar.

Áður hefur Dimma gefið út með Agnari Má hinn rómaða disk Láð, sem kom út fyrir tveimur árum, Atlantshaf (Agnar Már, Jóel Pálsson, Gunnlaugur Guðmundsson og Einar Scheving) 2006 og Ég um þig, sem hann gerði í félagi við Kristjönu Stefánsdóttur jazzsöngkonu árið 2005.

Hljóðritun á tónleikunum og eftirvinnslu annaðist Sveinn Kjartansson. Um ljósmyndun og hönnun umslags sá Högni Sigurþórsson.

Dark Thoughts gefin út í samvinnu við Dimmu í Svíþjóð

2009-10-13T17:12:17Z

Fyrsta sameiginlega útgáfa Dimmu á Íslandi og Dimmu í Svíþjóð hefur litið dagsins ljós, en það er platan Dark Thoughts með Sigurði Flosasyni og Norrbotten Big Band. Á plötunni er eingöngu efni eftir Sigurð í útsetningum hljómsveitarstjórans Daniels Nolgård. Norrbotten Big Band er ein af þekktari stórsveitum Evrópu og það er því fengur að þessari nýju plötu.
Dimma Sweden er sjálfstætt systurfyrirtæki Dimmu á Íslandi, stofnað fyrir þremur árum. Það hefur tekið að sér dreifingu á völdum titlum, s.s. Sagnadansi og plötu Guðrúnar Gunnars með efni eftir Cornelis Vreeswijk.

Tvær nýjar jazzplötur

2009-08-11T00:01:13Z

Dimma hefur gefið út tvær nýjar jazzplötur, Mæri með píanóleikaranum Árna Heiðari Karlssyni og Blik með gítarleikaranum Andrési Þór.
Á Mæri leikur Árni Heiðar ásamt Gunnari Hrafnssyni á kontrabassa og Matthíasi Hemstock trommuleikara. Efnið er allt eftir Árna, en útgáfutónleikar verða á Jazzhátíðinni í Reykjavík 28. ágúst nk.
Á Bliki koma fram ásamt Andrési Þór, þeir Valdimar K. Sigurjónsson á kontrabassa og Einar -Scheving á trommur, en efnið er jazzstandardar ásamt tveimur frumsömdum lögum eftir Andrés. Andrés Þór og félagar verða á tónleikaferðalagi um landið frá 11. - 20. ágúst, en útgáfutónleiakr verða á Jazzhátíð í Reykajvík 18. ágúst nk.

Guðrún Gunnars - tónleikaröð

2009-07-16T21:52:06Z

Guðrún Gunnars áamt fríðu föruneyti á tónleikaferð með ljóð og lög eftir söngvaskáldið góðkunna Cornelis Vreeswijk

Guðrún Gunnarsdóttir verður á ferð um landið og heldur tónleika á eftirtöldum stöðum:

Akureyri - Græni hatturinn - þriðjudaginn 21. júlí kl. 21

Vopnafjörður - Félagsheimilið - miðvikudaginn 22. júlí kl. 21

Húsavík - Hvalasafnið - fimmtudaginn 23. júlí kl. 21

Stykkishólmur - Stykkishólmskirkja - föstudaginn 24. júlí kl. 21

Reykjavík - Norræna húsið - laugardaginn 25 júlí kl. 16

Suðurland - Gamla Borg í Grímsnesi - sunnudaginn 26. júlí kl. 21

Á tónleikunum flytur Guðrún ljóð og lög eftir sænska söngvaskáldið Cornelis Vreeswijk í íslenskum búningi Aðalsteins Ásbergs Sigurðssonar, en geisladiskur með efninu er nýkominn út.

Ásamt Guðrúnu koma fram á tónleikunum þeir Tomas „Limpan" Lindberg, gítar, mandóla, búsúkí, Magnus „Storis" Holmström, nyckelharpa og kontrabassaharpa, Dan Berglund, kontrabassi,Valgeir Skagfjörð, píanó, harmónikka, Pétur Grétarsson, slagverk og Aðalsteinn Ásberg, kynningar og söngur.

]]>

Guðrún Gunnars áamt fríðu föruneyti á tónleikaferð með ljóð og lög eftir söngvaskáldið góðkunna Cornelis Vreeswijk

Guðrún Gunnarsdóttir verður á ferð um landið og heldur tónleika á eftirtöldum stöðum:

Akureyri - Græni hatturinn - þriðjudaginn 21. júlí kl. 21

Vopnafjörður - Félagsheimilið - miðvikudaginn 22. júlí kl. 21

Húsavík - Hvalasafnið - fimmtudaginn 23. júlí kl. 21

Stykkishólmur - Stykkishólmskirkja - föstudaginn 24. júlí kl. 21

Reykjavík - Norræna húsið - laugardaginn 25 júlí kl. 16

Suðurland - Gamla Borg í Grímsnesi - sunnudaginn 26. júlí kl. 21

Nýr geisladiskur - Guðrún Gunnars syngur ljóð og lög eftir Cornelis Vreeswijk

2009-07-16T20:16:50Z

Nýr geisladiskur - Guðrún Gunnars syngur ljóð og lög

eftir söngvaskáldið góðkunna Cornelis Vreeswijk

Dimma hefur gefið út nýjan geisladisk með söngkonunni Guðrúnu Gunnars. Á diskinum eru ljóð og lög eftir sænska söngvaskáldið Cornelis Vreeswijk í íslenskum búningi Aðalsteins Ásbergs Sigurðssonar. Það heyrir til tíðinda að jafn mikilvirkur og virtur höfundur komi nú fyrst út á íslensku en hugmyndin hefur verið í gerjun um árabil. Ásamt Guðrúnu eru flytjendurnir þeir Tomas „Limpan" Lindberg, sem leikur á gítar, mandólu og búsúkí, Magnus „Storis" Holmström, sem leikur á nyckelhörpu og kontrabassahörpu, Dan Berglund, sem leikur á kontrabassa,Valgeir Skagfjörð, sem leikur á píanó, harmónikku og fótstigið orgel og Pétur Grétarsson, sem leikur á slagverk. Auk þess syngur Aðalsteinn Ásberg eitt lag.

Svíarnir þrír sem koma að verkinu eru allir virtir tónlistarmenn. Tomas Lindberg hefur áður unnið með íslenskum tónlistarmönnum, þegar hann ásamt þjóðlagatríóinu Draupner hljóðritaði plötuna Sagnadans með Önnu Pálínu Árnadóttur, Magnus Holmström er margverðlaunaður meistari á nyckelhörpu og bassaleikarinn Dan Berglund er kunnastur fyrir leik sinn með djasstríóinu EST (Esbjörn Svensson Trio).

Geisladiskurinn var tekinn upp í Hljóðrita og sá Guðmundur Kristinn Jónsson um hljóðritun, en Styrmir Hauksson hljómjafnaði. Ólöf Erla Einarsdóttir hannaði umslag og bækling.

Áður hefur Dimma gefið út tvær sólöplötur Guðrúnar Gunnarsdóttur; Óð til Ellyjar (2003) og Eins og vindurinn (2004).

Hópurinn sem stendur að Cornelis Vreeswijk diskinum mun fylgja honum eftir með tónleikum á nokkrum stöðum dagana 21. - 26. júlí nk.

Cornelis Vreeswijk (1937-1987) var söngvaskáld, ljóðskáld og leikari, fæddur í IJmuiden í Hollandi, en fluttist 12 ára gamall ásamt foreldrum sínum til Svíþjóðar. Hann ætlaði sér að verða blaðamaður, en tónlistin varð fljótlega helsta viðfangsefni hans. Biturt háð og samfélagsádeila í verkum hans aflar honum sífellt nýrra aðdáenda. Á ferli sínum sendi hann frá sér nokkrar ljóðabækur og á fimmta tug LP platna í Svíþjóð og Hollandi. Auk þess að vera vinsæll tónlistarflytjandi lék hann við góðan orðstír í leikhúsum og kvikmyndum. Cornelis Vreeswijk er jafnan talinn meðal helstu söngvaskálda Svía.

Svavar Knútur - Kvöldvaka

2009-06-01T21:03:51Z

Svavar Knútur hljóðritaði nýverið geislaplötu sem kom út á dögunum og nefnist Kvöldvaka. Á plötunni ríkir sannkölluðu kvöldvökustemmning þar sem söngvaskáldið er í aðalhlutverki við eigin undirleik á gítar. Einnig leika á plötunni Ingólfur Magnússon á kontrabassa, Jón Geir Jóhannsson á slagverk og Hallgrímur Jónas Jensson á selló. Kvöldvaka kemur út í 500 tölusettum eintökum fyrir íslenskan markað og verður einungis seld á tónleikum og hjá útgefanda, en hægt er að nálgast plötuna eða stök lög af henni á tónlist.is Þessa dagana er Svavar Knútur á tónleikaferð í Þýskalandi og Danmörku, þar sem hann kynnir nýju plötuna. Á sumri komanda mun hann halda fleiri tónleika í Þýskalandi í kjölfar velheppnaðra tónleika í febrúar sl. en þá kom hann m.a. fram á hátíðinni Melodica Acoustic Festival í Hamborg fyrir um 1000 áheyrendur og var boðin þátttaka í tónleikaröðini „Songs & whispers" í júlímánuði. Með hljómsveitinni Hraun hefur Svavar Knútur áður sent frá sér tvær geislaplötur, Silent Treatment (2008) og I can´t believe it´s not happiness (2007). Kvöldavaka var hljóðrituð í Sundlauginni Stúdíói í byrjun apríl. Umslag hannaði Högni Sigurþórsson, en Prentsmiðja GuðjónÓ sá um prentverk.