Forsala á midi.is

Kristjana Stefáns og Svavar Knútur halda tónleika þar sem þau fagna útgáfu hljómplötunnar Glæður.         Á plötunni er að finna fjórtán hugljúf lög, þar af þrjú frumsamin, en platan varð til upp úr samstarfi þessa músíkalska pars, sem undanfarin ár hefur haldið fjölda dúettatónleika við sívaxandi vinsældir. Á Glæðum eru m.a. hin sígildu íslensku sönglög Við gengum tvö, Í dag skein sól og Enn syngur vornóttin, en til alþjóðlegra stórsmella má telja Abbalögin One of us og When all is said and done, auk hins sígilda lags hljómsveitarinnar Styx, Boat on the river.

Kristjana Stefánsdóttir er án nokkurs efa drottning hins íslenska djassheims, en hefur þó einnig sungið hina ólíkustu stíla og komið víða við, til dæmis í leikhúsinu, þar sem hún stýrði tónlistinni í Galdrakarlinum í Oz og brá sér hlutverk trúðsins Bellu í Dauðasyndunum sjö og Jesú Litla. Kristjana hefur gefið út fjölda hljómplatna, síðast blúsplötuna Better days blues, en af henni er einmitt lagið You left me Crying, sem þau Svavar flytja saman á Glæðum.

Svavar Knútur hefur undanfarin ár skipað sér í hóp fremstu söngvaskálda Íslands og vakið mikla athygli fyrir útgáfur sínar á sígildum íslenskum söng- og þjóðlögum á plötunni Ömmu. Einnig hafa frumsamin lög hans notið mikilla vinsælda, bæði með hljómsveitinni Hraun og á fyrstu sólóplötu Svavars, Kvöldvöku.

Dauði og djöfull er titill nýrrar plötu Sálgæslunnar, hljómsveitar sem skartar óvæntri samsetningu topp listamanna úr ólíkum geirum.  Andrea Gylfadóttir og Stefán Hilmarsson syngja, Sigurður Flosason leikur á saxófóna, Þórir Baldursson á Hammond orgel og Einar Scheving á trommur.  Soul, blús og jazz renna saman í ólíkum hlutföllum undir  taktföstum hljóðfæraslætti og húmorinn er aldrei langt undan.  Sjö aðrir hljóðfæaleikarar koma við sögu á disknum, en Þórir Úlfarsson gerði strengjaúsetningar og Sigurður Flosason blástursútsetningar. Tónlistin er öll eftir Sigurð Flosason, en textar ýmist eftir hann eða Aðalstein Ásberg Sigurðsson.   

Skáldsagan Ljósa eftir Kristínu Steinsdóttur er komin út á hljóðbók í lestri höfundar. Sagan hefur hlotið einróma lof og fyrir hana hlaut höfundurinn Menningarverðlaun DV 2010 og Fjöruverðlaunin, bókmenntaverðlaun kvenna 2011.

Ljósa elst upp í afskekktri sveit seint á 19. öld. Hana dreymir um framtíð þar sem hamingjan ríkir og sólin skín. En veruleikinn ætlar henni annað; þrátt fyrir góð efni og ástríka fjölskyldu vofir yfir henni ógn sem gefur engin grið.

Ljósa er hrífandi frásögn um gleði og sorgir einstakrar konu sem glímir við óvanalegar aðstæður..

Kristín Steinsdóttir hefur skrifað fjölda bóka og hlotið margvíslegar viðurkenningar fyrir verk sín. Margar af bókum hennar hafa komið út á hljóðbók.

Ljósa er  5:20  klst. Að lengd á einum mp3 diski, sem hægt er að spila í öllum dvd spilurum, tövlum og mp3 spilurum. Hljóðvinnslan sá um hljóðritun.

Út er komið á hljóðbók smásagnasafnið Milli trjánna eftir Gyrði Elíasson, bókin sem hlýtur Bókmenntaverðlaun Norðurlandaráðs 2011. Sigurður Skúlason leikari les sögurnar 47, sem einkennast af þeim áreynslulausa og myndríka stíl sem prýðir verk höfundarins. Í sögunum kallast umfjöllunarefnin ennfremur á við fyrrri sögur Gyrðis og bregður fyrir ýmisskonar óhugnaði og furðum, einsemd, draumum, ferðalögum, bernskuminningum og framtíðarsýnum.

Milli trjánna undirstrikar þá markvissu þróun sem orðið hefur í sagnaveröld Gyrðis í átt til eindregnari efnistaka, um leið og við erum minnt á grunngildi tilvoru okkar í þessum fjölbreytti en þó heildstæðu smásögum.

Hljóðbókin er  5:40  klst. að lengd á einum mp3 diski, sem hægt er að spila í öllum dvd spilurum, tövlum og mp3 spilurum. Georg Magnússon sá um hljóðritun. Kápuhönnun var í höndum Aðalsteins S. Sigfússonar.

Fjórðu minningartónleikarnir um söngvaskáldið Bergþóru Árnadóttur verða haldnir í Salnum í Kópavogi þriðjudginn 15. febrúar kl. 20. Það er Minningarsjóður Bergþóru sem efnir til tónleikanna en þeir eru að vanda haldnir á afmælisdegi hennar. 

Að þessu sinni verða mörg af þekktari lögum Bergþóru flutt í fyrsta sinn í kórútsetning-um og koma þrír kórar við sögu, en stjórnandi þeirra er Guðlaugur Viktorsson. Um er ræða hinn landsþekkta Lögreglukór Reykjavíkur, Kór Menntaskólans í Reykjavík og Vox Populi. Einnig kemur söngvarinn Jónas Sigurðsson fram með Lögreglukórnum.  Undirleik annast Gunnar Gunnarsson á píanó, Vilhjálmur Guðjónsson á gítar,  Tómas R. Einarsson á kontrabassa og Hjörleifur Valsson á fiðlu. Þau Aðalheiður Þorsteinsdóttir, Bára Grímsdóttir,  Skarphéðinn Hjartarson og Tryggvi M. Baldvinsson hafa útsett söng-lög Bergþóru fyrir karlakór og blandaða kóra.  Kynnir á tónleikunum verður Aðalsteinn Ásberg Sigurðsson. Þess er að vænta að tónleikarnir verði einkar veglegir og því ætti enginn aðdáandi söngvaskáldsins góða að láta þá framhjá sér fara.

Nýr geisladiskur með með bestu lögum Bergþóru Árnadóttur er kominn út. Þessi útgáfa hefur að geyma 22 lög sem gefa góða mynd af Berþóru sem höfundi og flytjanda. Fyrir þremur árum kom út 5 diska heildaútgáfa með verkum hennar, en sú útgáfa er uppseld. Meðal vinsælla laga á nýja diskinum má nefna Verkamann, Lífsbókina, Borgarljós, Móðursorg og Sýnir.

Diskurinn er sá fyrsti í nýrri útgáfuröð frá Dimmu. Útlitshönnun var í höndum Vilborgar Önnu Björnsdóttur.

Hin sívinsæla barnabók Dvergasteinn eftir Aðalstein Ásberg Sigurðsson kom út á eistnesku í byrjun mánaðarins hjá forlaginu Nynorden í Tallinn í þýðingu Toomas Lapp. Útgáfan er með nýjum myndskreytingum eftir Krõõt Kukkur. Dvergasteinn er fyrsta bók Aðalsteins sem kemur út í Eistlandi, en áður hefur bókin komið út í Danmörku og Finnlandi, auk þess sem sænsk útgáfa er væntanlega innan tíðar.

Aðalsteinn Ásberg heimsótti bókasöfn og skóla í Eistlandi á dögunum til að kynna bókina. Ásamt honum var Kristín Steinsdóttir rithöfundur á ferð og voru þau sérstakir gestir norrænu bókasafnavikunnar í bænum Pernü.

Á eistnesku nefnist bókin Kääbusekivi. Forlagið Nynorden gefur út norrænar bókmenntir á eistnesku og þýðingar á eistneskum nútímabókmenntum. 

Svavar Knútur söngvaskáld er nú í tæpra fjögurra vikna tónleikaferðalagi um Evrópu og kemur hann við í Bretlandi, Frakklandi, Þýskalandi, Belgíu, Hollandi, Sviss og Danmörku,

en plata hans Kvöldvaka er um þessar mundir að koma út hjá þýska útgáfufyrirtækinu Beste Unterhaltung.

Ferðin byrjaði vel í Bristol og Nottingham auk þess sem Svavar brá sér til Blackburn Lancashire snemma á Sunnudagsmorgni og lék fyrir hressa skáta á skátamóti þar í sveit.

Nú er Svavar Knútur á leið til Þýskalands eftir tvenna vel heppnaða tónleika í París. Þeir fyrri voru á litlu kaffihúsi sem heitir Le Béguin og þeir seinni á stærri tónleikastað, sem nefnist La Bellevilloise. Stemmningin var stórgóð á báðum stöðum og er Svavar hinn hressasti með útkomuna. "Ég hafði kannski ákveðna fordóma gagnvart frönskum áhorfendum, en það hefur svo sannarlega breyst og nú er París komin í toppflokkinn yfir tónleikastaði." 

Viðtökurnar hafa verið vonum framar að sögn Svavars og hittir hann alls staðar fyrir gott fólk og góða vini sem halda taka vel á móti honum. "Maður gistir bara hjá frábæru vinafólki hvar sem maður kemur og ég er alltaf að fatta betur og betur hvað ég er ríkur," segir Svavar og er hinn hressasti. "Maður hefði kannski átt að hugsa aðeins betur um tímasetninguna á þessu. Það er ekki gáfulegast í heimi að fara út til Evrópu á túr yfir hábjargræðistímann heima. Ég er búinn að afþakka fullt af verkefnum og tónleikum heima, en það er bara svo gaman að ferðast."

Framundan eru tónleikar í Köln, Hamburg, Leipzig, München, Duisburg, Gent, Münster, Frankfurt, Stuttgart og Árósum auk fleiri staða. Svavar segir frábært að spila í Þýskalandi, enda séu Þjóðverjar bæði góðir tónleikagestir og hafi mikinn áhuga á bæði tónlist og Íslandi. "Þessar meginlandsþjóðir í Evrópu eru náttúrulega með ríka menningu fyrir því að styðja við listir og kunna að meta þetta. Það eru ósköp fáir Ásbirnir sem maður er að rekast á þarna."

Á tónleikaferðinni er Svavar Knútur með plötuna Kvöldvöku í farteskinu, en í nóvember kemur svo út nýja platan hans, Amma, með sígildum íslenskum sönglögum.