Agnar Már Magnússon

Agnar Már Magnússon hóf tónlistarnám á unga aldri. Eftir lokapróf frá tónlistarskóla FÍH í Reykjavík og Conservatorium van Amsterdam í Hollandi stundaði hann nám hjá Larry Goldings og fleiri einkakennurum í New York. Þar komst hann jafnframt í kynni við marga þekkta djasstónlistarmenn og þau kynni leiddu m.a. til hljóðritunar fyrsta geisladisks hans sem ber nafnið 01. Núll einn var gefinn út 2001og honum dreift víða um heim af spænska plötufyrirtækinu Fresh Sound-New Talent. Síðan þá hefur Agnar sent frá sér marga geisladiska sem hafa flestir hlotið tilnefningar til Íslensku tónlistarverðlaunanna. Þeirra á meðal eru Tónn í tómið, tónleikaupptaka af píanó-dúett með Ástvaldi Traustasyni, og tveir geisladiskar með B3 tríó, Fals og Kör, þar sem Agnar leikur á Hammond orgel. Einnig gaf Agnar út frumsamda tónlist við leikritið Nítjánhundruð, sem var sýnt í Þjóðleikhúsinu, 2005. Agnar hefur hlotið verðlaunin Outstanding Musicianship Award frá Berklee tónlistarháskólanum í Boston og komist í undanúrslit í Alþjóðlegu djass-píanókeppninni Martial Solal í París 2002. Hann hefur
útsett tónlist fyrir geislaplötur og söngleiki, starfað með Stórsveit Reykjavíkur í mörg ár, leikið á tónleikum heima og erlendis og annast tónlistarstjórn í leikhúsi. Agnar starfar nú sem djasspíanisti en kennir jafnframt píanóleik við djassdeild Tónlistarskóla FÍH.